လူတိုင်း ထည့်ဝင် ပေးကြပါခင်ဗျာ

        “ထည့်ဝင်ပေးကြပါ” ဆိုတော့ ရုတ်တရက် ဘာကို ဆိုလိုမှန်း မသိဘူး ဖြစ်သွားပါလိမ့်မယ်။ “ထည့်ဝင်လှူဒါန်းပေးကြပါ” လို့ ပြောချင်ပေမဲ့ “လှူဒါန်း” ဆိုတဲ့ စကားလုံးကို အစဉ်အလာ အတိုင်းတွေးမိကြပြီး၊ “အော်… အလှူခံနေတာကိုး ” လို့ ထင်သွားမှာ စိုးလို့ အဲဒီစကားလုံးကို မသုံးလိုက်တာပါ။ ဆိုလိုတဲ့ အဓိပ္ပါယ်က အင်္ဂလိပ်စာလုံး “contribution” ရဲ့ အဓိပ္ပါယ် ကို ပြောချင်တာပါ။ 

          တောင်းခံချင်တာကတော့ ကိုယ့်လူ့အဖွဲ့အစည်း အတွက် ကိုယ်နိုင်သမျှလေးတွေ လုပ်ပေးကြဖို့ပါ။ အခုခေတ်က “civil society” လို့ ခေါ်တဲ့   “အရပ်ဖက်လူ့အဖွဲ့အစည်း” တွေ အားကောင်းမောင်းသန် လုပ်ကိုင်ကြတဲ့ခေတ်ပါ။ ပြီးခဲ့တဲ့ စနစ်ဆိုးကြီးရဲ့ နင်းချေမှုကြောင့် ဘယ်လောက်ပျက်စီးသွားသလဲ ကိုတော့ လူတိုင်း ၊ သိကြမှာပါ။ ထောက်လှမ်းရေးဆိုတဲ့ တစ္ဆေကြီးတွေကြောင့် လူတွေ တစ်ယောက်နှင့် တစ်ယောက် ယုံကြည်မှုကင်းမဲ့ကြလို့ ဝါးအစည်းပြေသလို တစ်ယောက်၊ တစ်ပေါက်လုပ်ကြ၊ ကိုင်ကြတာတွေ အရိုးစွဲခဲ့ရပါတယ်။ အဲဒါကြောင့်လဲ အများနဲ့ လုပ်ကိုင်ကြမဲ့ ကိစ္စတွေဆို ကွဲကြ၊ ပြဲကြတဲ့ ကိစ္စတွေ ကြားရတတ်ပါတယ်။ ကြားရတိုင်းလဲ တုံ့ပြန်သူတွေက အခုမှ ကွဲခဲ့ကြတာ၊ မဟုတ်တာ ဆိုပြီး ထိန်းသိမ်းဖို့ တာဝန်မဲ့ စကားတွေနဲ့ ပြီးခဲ့ကြတာပါပဲ။

          ကျွန်တော်တို့မှာ လူ့အဖွဲ့အစည်းမှာ အခုအထိ အောင်မြင်နေတဲ့ အဖွဲ့အစည်းတွေ ရှိပါတယ်။ နှစ်ပေါင်း ၁၀၀ ကျော် အောင်မြင်ခဲ့တာပါ။ ဥပမာ.. မလွန်ဆန်လှူအသင်းလို အဖွဲ့အစည်းတွေပါ။ နောက်ပြီး နိုင်ငံခြား အဖွဲ့အစည်းတွေက ပေးတဲ့ ပညာရေးအောင်လက်မှတ်တွေလို အဖွဲ့အစည်းတွေလဲ ကျွန်တော်တို့ နိုင်ငံမှာရှိခဲ့ပါတယ်။ ဆိုလိုတာက LCCI အောင်လက်မှတ် ဆိုတာ London Chamber and Commerce Industry  ဆိုတဲ့ လန်ဒန်မြို့စက်မှုနှင့်ကုန်သည်ကြီးများအသင်းက စံနှုန်းများ ချမှတ်ပြီး၊ အဲဒီစံနှုန်းတွေနဲ့ မေးခွန်းတွေထုတ် ၊ တစ်ကမ္ဘာလုံးမှာ စာမေးပွဲတွေ ကျင်းပပြီး အောင်လက်မှတ်တွေ ပေးကြတဲ့ အဖွဲ့အစည်းကြီးတွေပါ။ တကယ် တက္ကသိုလ်ပညာရေးဌာနအစစ်တွေ မဟုတ်ကြပါဘူး။ LCCI လို အလားတူ အဖွဲ့အစည်းကြီးတွေ ဖြစ်တဲ့ abe(Association of business executives) , ACCA, ICS ( International Charterd Shipbroker) စတဲ့ အခြားအဖွဲ့အစည်းပေါင်းများစွာ ရှိကြပါတယ်။

          အဲဒီ အဖွဲ့အစည်းကြီးတွေဟာ နှစ်ပေါင်းများစွာ တည်တံ့အောင်လုပ်ဆောင်နိုင်ခဲ့ကြပါတယ်။ အဲဒီနောက် ဒီအဖွဲ့အစည်းအတွင်း လာရောက်လုပ်ကိုင်မဲ့လူတွေ အဆင်ပြေအောင်လို့၊ မင်းတို့ ဒီအလုပ်တွေ ကို လုပ်ချင်ရင် ဒါတွေကို လေ့လာခဲ့ဆိုပြီး စည်းမျဉ်းတွေကို ပြဌာန်းခဲ့ပါတယ်။ အဲဒီကမှ တဆင့် အဲဒီပြဌာန်းချက်တွေကို စာမေးပွဲအဖြစ် အသွင်ဖန်တီးလာခဲ့ကြတာပါ။ သူ့တို့ ချမှတ်ထားတဲ့ စံနှုန်းတွေကို အမြဲခေတ်မှီအောင်ပြင်ဆင်၊ စာမေးပွဲတစ်ခုရဲ့ အဆင့်အတန်းကို အမြဲထိန်းသိမ်းလာခဲ့ကြပါတယ်။ အဲဒါကြောင့် ယခုဆိုရင် ကျွန်တော်တို့နိုင်ငံလို ပညာရေးအဆင့်အတန်း နိမ့်ကျတဲ့ နိုင်ငံတွေမှာ သူတို့ လက်မှတ်တွေက ပေါ်ပေါ်ထင်ထင် လူရာဝင်နေခဲ့ကြပါတယ်။

          အဲဒီအဖွဲ့အစည်းတွေကို အပြစ်ပြောချင်တာ မဟုတ်ပါဘူး။ သူတို့က ဒီလိုစနစ်၊ ဒီလို နာမည်ကောင်းလက်မှတ်အတွက် နှစ်ပေါင်းများစွာ ရင်းနှီးခဲ့ရတာပါ။ အမှန်တကယ်က ကျွန်တော်တို့တွေ ညံ့ဖျင်းခဲ့ကြတာပါ။

          ကဲ့ အဲဒီလို အင်္ဂလန်က ပညာရေးအဖွဲ့အစည်းတွေလိုမျိုး ကိုယ်ပိုင်အဆင့်အတန်း၊ ကိုယ်ပိုင်မေးခွန်း၊ ကိုယ်ပိုင်စာစစ်၊ ကိုယ်ပိုင်လက်မှတ်တွေ ပေးနေတဲ့ အဖွဲ့အစည်းတွေ ကျွန်တော်တို့ နိုင်ငံမှာ မရှိတော့ဘူးလား။ ရှိပါတယ်။ တကယ့်ကို နှစ်ပေါင်းတစ်ရာကျော်ပြီး၊ မြန်မာမင်းတွေ လက်ထက်က စခဲ့ကြပြီး အခုလက်ရှိအချိန်အထိ ရှင်သန်နေတဲ့ အဖွဲ့အစည်းတွေ ရှိပါသည်။ သံဃာတွေရဲ့ ပညာရေး အဖွဲ့အစည်းတွေပေါ့။ အခုလက်ရှိအထိ ခိုင်မာ ပြင်းထန်တဲ့ မေးခွန်းထုတ်၊ စာစစ် …စနစ်တွေနဲ့ တည်ဆောက်ထားပါတယ်။ ဥပမာ.. .မန္တလေးမြို့က “သကျသီဟဓမ္မာစရိယစာမေးပွဲ” ၊ ရွှေတိဂုံဘုရားပေါ်ရှိ “စေတီယင်္ဂဏဓမ္မာစရိယစာမေးပွဲ” စတဲ့ စာမေးပွဲကျင်းပပြီး၊ စာစစ်၊ ကိုယ်တိုင်လက်မှတ်ထုတ်ပေးတဲ့ အဖွဲ့အစည်းတွေပါ။ မန္တလေးမြို့က “သကျသီဟဓမ္မာစရိယ်စာမေးပွဲ” ဆိုရင် မြန်မာမင်းတွေ လက်ထက်ကထဲက စခဲ့ပြီး အခုအချိန်အထိ ဆက်လက်ကျင်းပနေဆဲပါ။

          အစိုးရက ကျင်းပတဲ့ ဓမ္မာစရိယစာမေးပွဲ ဆိုတာက ဒီအသင်းကြီး နှစ်ခု ထက် နောက်ကျပါတယ်။ အခုအသင်းကြီးနှစ်ခုက ဓမ္မာစရိယဘွဲ့ရပြီးတဲ့ ရဟန်းတော်တွေဆိုရင် ရဟန်းအချင်းချင်း စာတတ်တယ် ဆိုပြီး လေးစားကြတာပါ။ စာစစ်အဖြေလွှာတိုင်းရဲ့ ပထမဆုံးစာမျက်နှာ အပေါ်ဆုံးမှာ ခုံနံပါတ်တပ်ဖို့ ကွက်လပ်ပေးထားပါတယ်။ ကွက်လပ်ထဲမှာ ခုံနံပါတ်က လွဲလို့ အခြားဘာမှ ရေးခွင့် မရှိပါဘူး။ အဲဒီကွက်လပ်ရဲ့အောက်မှာ စာရွက်ကို အလွယ်တကူ ဆွဲဖြဲလို့ရအောင်း အပ်ပေါက်စက်နဲ့ အပေါက်တွေ စီပြီး၊ ဖေါက်လိုက်ပါတယ်။ ပြီးတော့ ထိုကွက်လပ်အတွင်းနဲ့ ကွက်လပ်အပြင်ကို လျှို့ဝှက်ဂဏန်းတစ်ခု ရိုက်ပါတယ်။ ကွက်လပ်အတွင်းမှာ ၈၆၆ ဆိုတဲ့ ဂဏန်းကို ရိုက်လိုက်ရင်၊ ကွက်လပ်အပြင်မှာလဲ ၈၆၆ ဆိုတဲ့ ဂဏန်းကို ရိုက်လိုက်တာပါ။

          နောက်ပြီးမှ အပ်ပေါက်ဖေါက်ထားတဲ့ ကွက်လပ်ပါတဲ့ အခြမ်းကို ဖြဲထုတ်လိုက်ပါတယ်။ အဲဒီကွက်လပ်ထဲမှာ ခုံနံပါတ်ရေးထားပါတယ်။ အဲဒီအပိုင်းကို မီးခံသေတ္တာထဲကို ထည့်သိမ်းထားတာပါ။ နောက်ဆုံးစာစစ်လို့ ပြီးမှ အဲဒီအပိုင်းနဲ့ ကျန်တဲ့ အဖြေလွှာအပိုင်းကို ပြန်ပေါင်းတာပါ။ ပြန်ပေါင်းတဲ့အခါ လျှို့ဝှက်နံပါတ်တွေရဲ့ အကူအညီနဲ့ပါ။ ဥပမာ… ကွက်လပ်ပါတဲ့အခြမ်းက ၈၆၆ ဆိုရင် အခြားအခြမ်းက ၈၆၆ နဲ့ ပြန်ဆက်ပေးလိုက်တာပါ။

          အဲဒီတော့ စာစစ်နေစဉ်အတွင်း ဘယ်ခုံနံပါတ်ဆိုတာကို သိခွင့်မရပါဘူး။ နောက်ဆုံး အပိုင်းနှစ်ခုပြန်ပေါင်းမှ ခုံနံပါတ်တွေ ပေါ်လာတာပါ။ အဲဒီအခါ စာစစ်မှုက ပြီးဆုံးသွားပြီ ဖြစ်လို့ အမှတ်ပိုပေးလို့မရ၊ လျှော့ပေးလို့မရတော့ပါဘူး။ ထိုစာစစ်တဲ့ နည်းတူ စာမေးပွဲ မေးခွန်းထုတ်မဲ့ ဘုန်းကြီးတွေကိုလဲ အသင်းက ဘယ်ဘာသာရပ်ကို ဘယ်ဆရာတော်မေးခွန်းထုတ်မယ်ဆိုတာကို ကြိုတင် မပြောပါဘူး။ မေးခွန်းထုတ်ချိန်ရောက်မှ ဆရာတော်တွေကို သွားပင့်တာပါ။ မေးခွန်းထုတ်ပြီး သည်မှ စာမေးပွဲဖြေပြီးသည်အထိ ဆရာတော်ကို ကျောင်းကို မပြန်ခိုင်းတော့ပါဘူး။ အဲဒီလို တင်းကျပ်ခဲ့တာပါ။ အခု ပြောပြတဲ့ လုပ်ဆောင်ကြပုံတွေကတော့ လွန်ခဲ့တဲ့နှစ်ပေါင်း ၅၀ခန့်က လုပ်ကိုင်ပုံတွေပါ။ အခုတော့ အဘယ်ကဲ့သို့ ဆောင်ရွက်ကြသလဲ ဆိုတာ အသေးစိတ် မသိပါဘူး။ တင်းကျပ်တဲ့ စည်းကမ်းနဲ့ လုပ်ပုံကိုင်ပုံတွေကို လျှောပေးကြမယ်တော့ မထင်ပါဘူး ။ အဲဒါကြောင့် သီဟိုဌ်ပြည်သွားပြီး ဒေါက်တာဘွဲ့ ယူလာတဲ့ ရဟန်းတွေ နှင့် နှိုင်းယှဉ်လိုက်လျှင်၊ ထို အဖွဲ့အစည်းနှစ်ခုမှ အောင်မြင်တဲ့ ရဟန်းတော်တွေကို ပိုပြီးလေးစားကြပါတယ် ။ ရဟန်းတော် အချင်းချင်းကို လေးစားကြတာပါ။

          အဲဒီလို အဖွဲ့အစည်းကြီးတွေ ကျွန်တော်တို့နိုင်ငံမှာ အောင်မြင်ခဲ့တာပါ။ ကျွန်တော်တို့နိုင်ငံရဲ့ ဒီလိုတင်းကျပ်ပြီး၊ စည်းကမ်းရှိတဲ့ သံဃာအဖွဲ့အစည်းတွေက မြန်မာနိုင်ငံပညာရေးကို ကျောထောက်နောက်ခံပြုခဲ့ဖူးပါတယ်။ အဲဒီလို ကောင်းမွန်တဲ့အစဉ်အလာတွေရှိခဲ့ရဲ့သားနဲ့ ကျွန်တော်တို့ခေတ်ရောက်မှ ညံ့ကြတော့မှာလား။ ပညာရေးဆိုတာကို လိုအပ်ရင် ပြင်ပမှ တင်သွင်းရပါမယ်။ နိုင်ငံခြားကို ပညာသင်တွေသွားရပါမယ်။ အဲဒါတွေကို အပြစ်ပြောနေတာ မဟုတ်ပါဘူး။ ကိုယ့်နိုင်ငံရဲ့ ကောင်းမွန်တဲ့အစဉ်အလာတွေကို သိရှိသလောက် တစိတ်တပိုင်း မီးမောင်းထိုးပြခြင်း ဖြစ်ပါတယ်။

       အားကောင်းတဲ့ ပညာရေးစနစ်ကြီးတွေကို မောင်းနှင်ခဲ့ကြတာက တနည်းပြောရရင် အရပ်ဖက်အဖွဲ့အစည်းတွေပါ။ သံဃာတော်များနှင့် အသင်းဝင်မြို့မိမြို့ဖတွေပါ။ အခုပွင့်လင်းတဲ့ခေတ်ပြောင်းမှာ ကျွန်တော်တို့ အားကောင်းတဲ့ အရပ်ဖက်အဖွဲ့အစည်းတွေ ဖွဲ့စည်းထူထောင်ကြဖို့ အချိန်ကြနေပါပြီ။ အရပ်ဖက်အဖွဲ့အစည်းတွေဆိုတာ ကျွန်တော်တို့ တစ်ဦးချင်း၊ တစ်ယောက်ချင်းရဲ့ ကိုယ်တိုင်အားထုတ်ပါဝင်မှုအစုအစည်းတွေ မဟုတ်ပါလားဗျာ။

        တတ်နိုင်သမျှ ဆွမ်းလောင်းအသင်းမှ စလို့ ဗုဒ္ဓဘာသာလူငယ်အသင်း၊ စာကြည့်အသင်းတွေမှာ တနိုင်တပိုင် အဖွဲ့ဝင်ကြပြီး၊ အဖွဲ့အစည်းနှင့် လုပ်တတ်ကိုင်တတ်ခြင်း ၊ ဦးဆောင်မှုပေးတတ်ခြင်း၊ နောက်လိုက်ကောင်းအဖြစ် ကျရာနေရာမှ အကောင်အထည်ဖေါ်တတ်ခြင်း …စတဲ့ နည်းစနစ်များကို ကိုယ်တိုင်ပါဝင်လေ့ကျင့်ကြဖို့ အချိန်အခါကြရောက်ပြီမို့ တတ်နိုင်သမျှ မြန်မာလူ့အဖွဲ့အစည်းအတွက် ထည့်ဝင်ပေးလိုက်ကြပါစို့။

     

(ကျွန်တော် သိရှိသလောက် မျှဝေခြင်း ဖြစ်ပါတယ်။ )