တခါကအင်တာဗျူးတစ်ခုတွင် ဆရာအောင်မောင်းက ပါမောက္ခဒေါက်တာဒေါ်ခင်စန်းရီးကို မေးခွန်းတစ်ခုမေးပါသည်။ မေးခွန်းမှာ …ဂျပန်ပြည်မှ စက်ပစ္စည်းများကို တရုတ်ပြည်သို့ ပို့၍ တရုတ်လုပ်သားများနှင့် ထုတ်လုပ်စေပါက၊ မူလဂျပန်ပြည်တွင် ထုတ်လုပ်သည့်အတိုင်း ကုန်ချော ပစ္စည်းအရည်အသွေးကောင်းမွန်ပါမည်လား….ဆိုသည့် မေးခွန်းပင် ဖြစ်သည်။ ထိုမေးခွန်းကို ဆရာမကြီးက မတူညီနိုင်ပါဟု ပြန်ဖြေပါသည်။ အဘယ်ကြောင့်ဆိုသော် စက်ပစ္စည်းများတူညီသော်လည်း၊ လုပ်သားများ၏ အရည်အသွေးသည် မတူညီကွာခြားသောကြောင့် ဖြစ်ပါသည်။ ပစ္စည်းများကို ထုတ်လုပ်ရာတွင် စက်တစ်ခုထဲမှ ထုတ်လုပ်သည် မှန်သော်လည်း၊ ထွက်ရှိလာသည့် ပစ္စည်းအားလုံး၏ အတိုင်းအတာ၊ အရည်အသွေးသည် တူညီမှုမရှိပါ။ စက်တစ်ခုတွင် ထိန်းညှိသောစနစ်များကို ကိုင်တွယ်နေသူ၏ အရည်အသွေး နှင့် ဂရုစိုက်မှုအပေါ်တွင် များစွာ မူတည်ပါသည်။
ထိုစက်ရုံ၏ အရည်အသွေးကို စီမံခန့်ခွဲသော စနစ်ကွာခြားသလို ပစ္စည်း၏ အရည်အသွေးလည်း ကွာခြားနိုင်ပါသည်။ အလုပ်သမားတစ်ဦးစီ၏ မိမိအလုပ်နှင့်ပတ်သက်၍ တာဝန်ယူမှု၊ ဂရုစိုက်မှု အပေါ်တွင်လည်း မူတည်ပါသည်။ ဂျပန်ပြည်ရှိ အလုပ်သမားတို့၏ အလုပ်ကြိုးစားသောစိတ်ဓါတ်၊ တာဝန်ယူသောစိတ်ဓါတ်တို့ကြောင့် အရည်အသွေးကောင်းမွန်သောပစ္စည်းများ ထုတ်လုပ်နိုင်ခြင်း ဖြစ်သည်။
အစ္စရေးနိုင်ငံသည် စတင်ထူထောင်ခဲ့စဉ်ကာလက အလွန်ခက်ခဲကြမ်းတမ်းခဲ့ပါသည်။ အိမ်နီးချင်းနိုင်ငံများသည် ရန်ဘက်နိုင်ငံများအဖြစ် ဝန်းရံလျှက်ရှိပါသည်။ နိုင်ငံအသစ်တွင် အစစအရာရာ ချို့တဲ့ပြီး၊ တိုက်ပွဲပေါင်းများစွာကို တိုက်ခိုက်နေခဲ့ရပါသည်။ အဝေးနိုင်ငံတို့တွင် ပြန့်ကျဲနေသောဂျူးလူမျိုးတို့သည် ထူထောင်ကာစနိုင်ငံအသစ်သို့ ပြန်လည်ဝင်ရောက်ကာ၊ နိုင်ငံတည်ဆောက်ရေးများကို လုပ်ကိုင်ကြပါသည်။ အဝေးနိုင်ငံတို့တွင် အတည်တကျအလုပ်အကိုင်ကောင်းတို့ဖြင့် အဆင်ပြေနေသောသူတို့သည် အစ္စရေးနိုင်ငံသစ်တွင် အလုပ်မရွေးပဲ၊ သင့်တော်သောအလုပ်ကို လုပ်ကိုင်ကြရပါသည်။ အမေရိကန်နိုင်ငံရှိ သံစုံတီးဝိုင်းကြီးရှိ တယောပညာရှင်က အစ္စရေးနိုင်ငံသစ်တွင် လက်လုပ်လက်ပစ်ဗုံးကို စနစ်တံကျပ်သည် အလုပ်ကို လုပ်ပေးခဲ့သည်။ စနစ်တံကျပ်သည့် လက်အချိန်အဆသည် အလွန်အရေးကြီးပါသည်။ အချိန်အဆလိုလျှင် သတ်မှတ်ထားသောအချိန်အတိုင်းအတာ မရောက်မှီပေါက်ကွဲပါက ပေါက်ကွဲမှုသည် မထိရောက်ပါ။ အချိန်အဆသည် လိုအပ်သည်ထက်များသွားလျှင် အချိန်ကျော်လွန်သွားမှ ပေါက်ကွဲခြင်း ဖြစ်ပါလိမ့်မည်။
ထိုသို့ လက်ပစ်ဗုံးစနစ်တံကျပ်ခြင်းကို လုပ်ကိုင်စဉ်အတွင်း လက်ပစ်ဗုံးသည် ပေါက်ကွဲနိုင်ပါသည်။ ထိုသို့အန္တရာယ်များပြီး အသက်နှင့်ရင်းနှီးရသောအလုပ်ကို တယောပညာရှင်က လုပ်ကိုင်သည်မှာ သူ၏ နိုင်ငံအပေါ်ထားရှိသည့် မျိုးချစ်စိတ်ဓါတ်ကို ပြသခြင်းဖြစ်သည်။
စက်ပစ္စည်းအစိတ်အပိုင်းတစ်ခုတွင် ကုန်ကြမ်းအဆင့်မှ အပြီးသတ်ထုတ်လုပ်မှုအဆင်သို့ မရောက်မှီအဆင့်ပေါင်းများစွာ ဖြတ်သန်းရပါသည်။ အဆင့်တစ်ဆင့်တွင် သတ်မှတ်ထားချက်များကို အရည်အသွေးပြည့်မှီမှ နောက်တစ်ဆင့်သို့ ကူးပြောင်းရပါသည်။ အဆင့်တစ်နေရာတွင် အရည်အသွေး မပြည့်ဝလျှင် နောက်အဆင့်နေရာများတွင်လည်း အရည်အသွေးမပြည့်ဝနိုင်တော့ပါ။ စက်ပစ္စည်းတစ်ခုတွင် စက်အစိတ်အပိုင်းတစ်ခု ချို့ယွင်းအရည်အသွေး မပြည့်မှီလျှင် စက်တစ်ခုလုံး၏ အရည်အသွေးသည် ကျဆင်းသွားပါလိမ့်မည်။ ဆိုလိုသည်မှာ စက်တစ်ခု၏အရည်အသွေးသည် ထိုစက်တွင်ပါဝင်သောအစိတ် အပိုင်းများ၏ အရည်အသွေးအပေါ်တွင် မူတည်ပါသည်။ အစိတ်အပိုင်းတို့၏ အရည်အသွေးသည်လည်း ထုတ်လုပ်မှုတိုင်း၊ အဆင့်တိုင်းအတွက် သတ်မှတ်ချက်များကို ပြည့်မှီရမည်ဖြစ်သည်။
တရုတ်နိုင်ငံတွင် တည်ဆောက်သောသင်္ဘောတို့ရှိ ပိုက်လိုင်းစနစ်များတွင် ပါဝင်သောပိုက်လိုင်းများ၏ အဆက်များသည် လူမြင်ရန် မလွယ်ကူသောနေရာများတွင် သုံးရမည်ဘို့နှင့် နပ်လေးလုံးရှိလျှင် သုံးလုံးသာတပ်ထားပါသည်။ ထိုသုံးလုံးတွင် တကယ်တမ်း ကျပ်အောင်တိုက်ထားသည့်အလုံးမှာ နှစ်လုံးသာဖြစ်ပါသည်။ နပ်( nuts) တစ်လုံးကို မည်မျှခိုင်အောင် ကျပ်ထားသနည်းဟူသော မေးခွန်း၏ အဖြေကို ထိုအလုပ်သမားကိုယ်တိုင်သာ ဖြေနိုင်ပါလိမ့်မည်။ သို့သော် ကျွန်တော်တို့ကဲ့သို့ နိုင်ငြံ့ခားသားများအမြင်တွင် ထိုအလုပ်သမား၏ လုပ်ရပ်သည် တရုတ်နိုင်ငံအလုပ်သမားထု၏ လုပ်ရပ်ကဲ့သို့ ထင်မြင်မိပါသည်။
ကျွန်တော်သည် ၉၆ ခုနှစ်အရေးအခင်းဖြစ်၍ တက္ကသိုလ်ကျောင်းများ ပိတ်ထားစဉ် မွေးမြူရေးလုပ်ငန်းတစ်ခုကို လုပ်ကိုင်ပါသည်။ ထိုစဉ်က အတူလက်တွဲခဲ့ဖူးသောလူတစ်ဦးမှာ နိုင်ငံရေးအမှုဖြင့် ထောင်ဒဏ်(၁၁)နှစ်ခန့် ကျခဲ့ဖူးသူဖြစ်ပါသည်။ ထိုသူ၏ ပြောဆိုပေါင်းသင်းဆက်ဆံရေးမှာ အလွန်ကောင်းပါသည်။ နိုင်ငံရေးစကားကိုလည်း များစွာပြောဆိုခြင်း မရှိပါ။ နောက်မှ သူ ပြောပြသောကြောင့် သူထောင်ဒဏ်များစွာ ကျခဲ့ဖူးကြောင်းသိရခြင်း ဖြစ်ပါသည်။ သူနှင့် စကားပြောဆိုခြင်းမှ ကျွန်တော့်အတွက် ပညာများစွာကို ရရှိခဲ့ပါသည်။ သူက ကျွန်တော့်ကို မေးခွန်းတစ်ခု မေးပါသည်။ “ ကိုယ်ကျင့်တရားဆိုတာ ဘာလဲ “ ဆိုသည့် မေးခွန်း ဖြစ်ပါသည်။ “ဒီမေးခွန်းကို အကိုးအကားမပါဘဲ မင်း ကိုယ်ပိုင်လက်ခံထားတဲ့ အမြင်တစ်ခု အနေနဲ့ ငါကို ဖြေပေးပါ။ ” လို့ မေးမြန်းပါသည်။ ကျွန်တော် ကောင်းစွာ မဖြေဆိုနိုင်ပါ။ ထို့နောက် သူက “ကိုယ်ကျင့်တရား ဆိုတာ ကိုယ် မခံနိုင်တာကို သူများကို သွားမလုပ်ဖို့ပါဘဲ။” လို့ သူက ပြောပါတယ်။
ထို့အတူ နိုင်ငံရေးဆောင်ရွက်လှုပ်ရှားမှုများနှင့် ပတ်သက်သော အမြင်ကို ဆက်ပြောဖြစ်ကြပါသည်။ သူက ကျွန်တော့်ကို “ငါက အရင်တုန်းက အောင်မြင်တဲ့ရှေ့နေတစ်ယောက်လုပ်တယ်။ အရေးအခင်းဖြစ်တော့ ရှေ့နေများကောင်စီအတွင်းရေးမှူးလုပ်တယ်။ နောက်တော့ NLD ပါတီဝင်တယ်။ အဲဒါတွေအတွက် စုစုပေါင်းထောင်(၁၁)နှစ်ကြတယ်။ ငါ ဒီလို လုပ်ပေမဲ့ မင်းကို လုပ်ဖို့ မတိုက်တွန်းဘူး။ မဆွယ်ဘူး။ ငါ့ ယုံကြည်ချက်အတွက် ငါလုပ်တာ။ ငါ ပေးဆပ်နိုင်သလောက် ငါ လုပ်တာ။ အဲဒီတော့ မင်း ပေးဆပ်နိုင်သလောက် လုပ်ဖို့ပဲ ငါ မျှော်လင့်တယ်။ ဘယ်၍ ဘယ်မျှ မတိုက်တွန်းပါဘူး။ လက်ညှိုးလေးညွန်ပြီး နိုင်ငံရေးသမားကို ထောက်လှမ်းရေးတွေလက်ကနေ လွတ်အောင် ကူညီနိုင်ရင် လက်ညှိုးလေးပဲ ညွှန်ပေးပါ။ အဲဒီ ကိုယ်နိုင်သလောက် ဝန်လေးပဲ ထမ်းပေးပါ။ ” လို့ ကျွန်တော့်ကို ပြောဆိုခဲ့ဖူးပါတယ်။
ထိုနည်းတူမှတ်သားလောက်သောစကားတစ်ခွန်းကို ဆရာကျော်ဝင်းကလဲ ပြောခဲ့ဖူးပါတယ်။ “ကျွန်တော်တို့ အခုလို စစ်အာဏာရှင်လက်အောက်ကို ကျရောက်နေတဲ့အတွက် ဘယ်သူ့ကြောင့်၊ ဘယ်ဝါ့ကြောင့်လို့ မပြောချင်ပါဘူး။ ကျွန်တော်တို့ အားလုံးမှာ ကိုယ်စီ ကိုယ်ငှ တာဝန်ရှိပါတယ်။”
ထိုနည်းတူ နိုင်ငံတစ်ခု၏ ပုံရိပ်သည် နိုင်ငံသားတိုင်း၏ အတွေးအခေါ်နှင့် လုပ်ရပ်များ၏ မှတ်ကျောက်ပေါ်လွင်မှုအတိုင်းသာ ဖြစ်ပေလိမ့်မည်။ အစိတ်အပိုင်းလေးတိုင်း၏ အရည်အသွေးပြည့်မှီမှုသည် စက်တစ်ခုလုံးအပေါ်တွင် သက်ရောက်နေသောကြောင့် နိုင်ငံတစ်ခု၏ ပုံရိပ်သည်လည်း ကျွန်တော်တို့တစ်ဦးစီ၏ ပုံရိပ်များအပေါ်တွင် တည်မှီနေပါလိမ့်မည်။
ထို့အတူ နိုင်ငံတစ်ခု၊ အဖွဲ့အစည်းတစ်ခု၏ အရည်အသွေးမှာ ထိုနိုင်ငံနှင့် အဖွဲ့အစည်းတွင် ပါဝင်သောလူတို့၏ အရည်အသွေးပြည့်ဝမှုအပေါ်တွင် များစွာတည်မှီနေပါသည်။ တစ်ဦးတစ်ယောက်ချင်း၏ အရည်အသွေးပုံရိပ်သည် နိုင်ငံ၏ပုံရိပ်အဖြစ်ရောက်ရှိလာမည်ဖြစ်သောကြောင့် ကျွန်တော်တို့တစ်ဦးချင်း မိမိတို့ပုံရိပ်များ ကောင်းမွန်စေရန်တာဝန်ယူမည်ဆိုလျှင်…
(ကျွန်တော့်ရဲ့ အတွေးလေးမျှဝေပေးထားခြင်း ဖြစ်ပါတယ်။ )
No comments:
Post a Comment